香港人必睇韓國演唱會門票購買攻略（2026年最新版）

Hello，大家好 ，我哋係由韓國人每日提供最新韓國旅行資訊嘅Creatrip。 

相信好多鍾意韓國嘅朋友們都係對KPOP、韓國偶像同音樂有興趣，小編自己都已經追星追咗超過10年，當然都搶過唔少韓國演唱會飛。但係買韓國演唱會飛真係要好似比賽咁，只要慢人一秒可能就會失敗...

韓國售票系統相對上節奏更快、競爭更大，而且有時候流程都好混亂，今次小編就打算將自己私藏嘅演唱會搶飛秘笈寫出嚟公開俾大家睇，由頭到尾教大家點用韓國售票網買飛、搶演唱會飛有咩要注意、搶唔到飛可以點做等等。只要事前準備好、策略清晰，外國人都一樣可以成功搶到想睇嘅演唱會門票！

韓國演唱會門票購買攻略

韓國有邊幾個演唱會門票售票網？

想買韓國演唱會門票，外國粉絲們通常都會用以下呢5個網站/平台買飛，小編自己5個都有用過，各有各特徵：

1. NOL Ticket/NOL World_{(NOL 티켓、前Interpark Ticket)}

• 網址：韓國版 | 國際版
• 語言：韓文、中文、英文、日文

講起韓國最出名嘅售票網站，一定唔少得Interpark Ticket！呢個網站喺2024年年尾改咗名做「NOL Ticket」，外國版就叫做「NOL World」。雖然整體介面設計亦有更新，不過但整體搶飛流程、核心系統同服務上就冇咩分別。

韓國好多大型演唱會、音樂劇、音樂節都會用呢個平台售票，所以如果你有打算搶KPOP演唱會門票，NOL係其中一個你一定要知嘅平台之一。

2. YES24 Ticket_{(예스24 티켓)}

• 網址：韓國版 | 國際版
• 語言：韓文、英文

「YES24」原本係一個大型網上書店，後來發展成韓國其中一個主要演唱會售票平台。唔少粉絲會員優先預售都會喺YES24進行。佢嘅英文版網頁基本上夠用，但有時更新速度會比韓文版慢少少。如果你打算經英文網頁買飛，最好都提早熟習一下個網站操作。

3. Melon Ticket_{(멜론 티켓)}

• 網址：韓國版 | 國際版
• 語言：韓文、中文、英文、日文

如果你平時已經對韓國音樂圈比較熟，Melon呢個平台你應該唔會陌生。「Melon Ticket」由 Kakao相關體系營運，本身同韓國音樂生態連結好深。唔少中型演唱會、粉絲見面會同音樂節門票都會喺Melon Ticket開賣，當然每年萬眾矚目嘅MMA（Melon Music Awards）頒獎典禮門票都會喺呢度賣啦！

4. Ticket Link_{(티켓링크)}

• 網址：韓國版 | 國際版
• 語言：韓文、中文、英文、日文

「Ticket Link」都係韓國其中一個常見售票平台，比起大型KPOP演唱會，比較多演出、活動、體育賽事門票等都會經佢哋發售，偶爾都可以喺呢度搵到比較小型嘅演唱會門票。

5. Creatrip_{(크리에이트립)}

• 網址：繁體中文(香港)版 | 英文版
• 語言：中文(繁/簡)、英文、日文等15種語言

除咗以上幾個主流售票平台之外，香港朋友們其實亦可以留意埋我哋Creatrip網站！可能大家以為我哋只會提供韓國最新旅行資訊，但其實我哋都有賣各種拼盤演唱會、頒獎典禮、特別KPOP活動同演出嘅外國遊客專用門票。就算係本身預計好難買飛嘅活動，因為大家唔需要同韓國人爭飛，競爭相對比較細、成功機會更大！

我哋平台亦都有提供各大演唱會場地接駁車、追星神器手機租借同應援棒租借等等嘅服務，如果你已經買咗演唱會飛，都可以透過我哋預約各種追星族必備服務！

韓國演唱會門票大約幾多錢？

※2025-2026年平均門票價錢

實際韓國演唱會票價會因藝人級別、場館規模、座位區域而差好遠，所以以上數字僅供參考。如果會再加埋參加Sound Check等額外選項，價錢就會再高一截。

另外除咗門票價錢，買韓國演唱會飛嘅時候可能仲需要俾埋訂票手續費（大約₩1,000-4,000），如果係用海外信用卡，根據平台同銀行政策可能需要俾多筆手續費。再計埋交通、買周邊同應援用品嘅價錢，大家預算記住預鬆少少！

💡小編小貼士：如果你喺韓國住，或者想先將門票寄去朋友屋企，通常需要另外支付郵寄費用（大約2,500-3,500）；如果會揀直接去現場取票，記住要預早到場排隊同核對身份。

搶演唱會飛之前有咩需要準備？

根據小編個人經驗，如果想提高成功機率，記住要準備好以下三樣嘢！

1. 韓國電話號碼

而家大部分韓國售票網嘅國際版都可以用海外電話號碼註冊，不過如果你想直接用韓國版網站，某啲驗證流程有機會會要求你用韓國手機短訊進行認證。所以雖然唔係一個must，但如果有韓國電話號碼會比較方便！

如果冇嘅話，推薦大家可以去到韓國之後買一張包電話號碼嘅韓國SIM卡，或者用朋友嘅韓國電話號碼（不過視乎平台規定，可能唔可以咁做），又或者優先選擇唔需要韓國手機認證嘅公開售票場次。

2. 已經開通海外付款嘅信用卡/韓國銀行戶口

對外國人嚟講，俾錢係最容易出事嘅一關，好容易因為付款問題最後買唔成，特別係海外扣賬卡好容易被拒絕。呢個時候最常見同可行嘅方式係用Visa或者Mastercard信用卡，不過海外信用卡有時處理速度會慢少少，或者有機會中途失敗。

另一個小編個人推薦嘅方式係透過銀行轉賬_{(무통장입금)}付款，呢個方法最快，不過前提係你要有韓國銀行戶口，或者有人可以幫你做韓國本地入數。而且因為揀銀行轉帳嘅話，很多時可以先成功保留座位，再喺限時內付款就可以。即係話開賣嗰一刻你唔需要即時完成付款流程，會快好多。不過如果你人唔喺韓國，通常自己完成唔到韓國銀行轉賬呢一步，所以通常都會請韓國朋友幫手，或者經代購服務處理付款部分。

如果你打算靠自己，建議最好唔好等到正式搶飛嗰日先第一次用你張信用卡俾錢！你可以預早揀一場冇咁熱門嘅活動，用自己張信用卡試一次流程。部分平台提供短時間內免費取消，咁你就可以順便測試付款有冇問題。

3. 明星官方會員會籍

呢層需要睇下你想買嘅演唱會會唔會開放會員優先購買，不過大部分人氣團體都會有！有官方會員會籍就可以搶先喺正式公開發售之前買飛，相對上競爭會比較細、成功機會更高。

好似HYBE旗下藝人通常會用 Weverse membership、JYP 藝人部分就會要求用FANS membership，其他大型公司旗下明星歌手亦都會另外有自己一套會員制度。如果你係長期追某一隊，而且唔止睇一次演唱會，咁小編就覺得官方會員會籍係值得投資嘅；如果你只係偶爾想睇一次，或者未必會長期追，咁就未必一定要為咗一次演出而買會員。

韓國演唱會點樣買飛？話你知完整購票流程

喺韓國有想睇嘅演唱會或表演，但係成日都爭唔贏其他人？大家只要跟住以下呢幾個小貼士做，成功機率會高好多！

Step 1 | 確認清楚開賣時間同售票平台

搶飛之前，最基本要知道準確開售日期同時間、喺邊個平台賣（NOL、YES24、Melon Ticket 等）、屬於邊種發售方式（官方會員預售、公開發售等）、演出日期同場次，而通常呢啲資訊都可以喺藝人官方Instagram、X、Weverse、fancafe、售票平台活動頁面同主辦方公告度搵到。

💡小編小貼士：韓國時間係 KST（UTC+9、快香港1個鐘），記住要計好時間，唔好因為時差錯過開賣時間！

Step 2 | 預先揀定目標座位

小編個人覺得買飛之前最重要係要先諗好想坐咩位，排好優先次序。例如：

• 第一選擇：中間區、視野最好
• 第二選擇：側邊近台區
• 第三選擇：上層或較後位置，只求入到場

尤其如果你係第一次搶飛，或者手速唔算特別快，最重要唔係一開始就衝最靚位，與其死守最熱門區，不如預先接受一個較實際嘅範圍，成功率反而高啲。

Step 3 | 正式搶之前最好先練習一次

韓國搶飛有時唔係輸喺你唔識預約，而係輸喺你未夠熟手。由登入、撳入預約頁面，到揀位、付款，每一步只要慢半秒，結果都可能差好遠。

除咗可以真實試預約比較冷門嘅演唱會，韓國有好多網站都可以模擬搶演唱會飛，大家可以抽時間熟習下成個購票流程，到時候實戰會更加得心應手！以下係幾個小編自己都用過嘅模擬搶飛網站，推薦俾大家！

Grape Game

呢個係一個模擬揀位過程嘅反應速度小遊戲，聽落好似有啲無厘頭，但呢種練習其實真係有用。小編到而家遇到重要搶飛日之前，都仲係會玩幾次當熱身。

入到去之後用最快速度撳走深紫色方格就得（代表購票時可選座位），幫大家訓練到一見到有位，手就可以即刻作出反應，建立搶位時嘅手感同肌肉記憶。

TIKI

TIKI 係一個模擬 Interpark/NOL同Melon Ticket介面嘅練習網站。入到去之後可以揀英文版面再登入，之後就可以揀練習「開賣搶飛」或者「搶取消飛」，揀好難易度之後就可以按照流程完整做一次模擬購票。

不過Interpark喺2024年已經改名做 NOL Ticket，而家畫面介面同以前會有少少唔同，不過整體購票流程其實差唔多！

如果大家想真實試一次買演唱會飛，都可以去返同一個售票網站入面揀一場比較冷門嘅演唱會或者活動，由登入、揀位、付款都可以run through一次。不過大家一定要記住check清楚退款政策（大部分韓國售票網24小時內都可以全額退款），如果唔洗曬咗一筆錢就無謂啦。

Step 4 | 對準平台伺服器時間

就算只係相差1至2秒，都有可能令你早一步入到場，反而言之可能等你入到去時啲位已經冇晒。所以唔少韓國搶飛高手都會用一個叫Navyism嘅網站，去睇各個售票平台伺服器最準確時間。

呢個網站本身原本係俾韓國大學生reg科嘅時候用嘅工具，後來就慢慢變成咗韓國演唱會搶飛時好多人都會用嘅標準工具之一。

點樣用 Navyism對準售票平台伺服器？

1. 去 https://navyism.com
2. 輸入售票平台網址（例如 nol.interpark.com 或 ticket.melon.com）
3. 畫面就會顯示該網站嘅即時伺服器時間

💡小編小貼士：用Navyism唔需要另外登入，只要輸入平台網址就得；建議另外開一個分頁，，正式搶飛時一直開住！

Step 5 | 最少提早10至15分鐘登入

小編買過好多次演唱會飛，得出嘅結論係唔好等到開賣前一分鐘先登入！最理想係：

• 提早登入售票帳號
• 打開演唱會頁面
• 開埋伺服器時間網站
• 準備好付款資料
• 寫低自己目標座位區

Step 6 | 畫面點安排最好？

因為要對準時間入到去，所以最好可以同時睇到售票頁面同時間，最常見兩個做法係「同一屏幕分兩邊」或者「用雙螢幕」！如果你屋企得一部電腦一個screen，咁就半邊放售票網站、半邊放伺服器時間網站；如果有兩個screen，或者你另外有tablet，就可以一邊放售票網站、一邊放伺服器時間網站。

💡小編小貼士：重點唔係設備愈多愈好，而係你要確保自己正式開賣時唔會手忙腳亂！

Step 7 | 正式開賣後流程

開賣前5分鐘

建議預先登入好，然後停留喺演唱會活動頁面。呢個時候預約按鈕仍然會係灰色，未撳得住。另外亦要開住Navyism 睇時間，一邊等正式開賣。

開賣前2分鐘

建議呢個時候撳一次F5重新整理頁面，確認網絡同連線一切正常。

開賣前1分鐘

而家有啲平台會直接喺頁面顯示倒數計時器，如果你見到開始倒數就記住唔好refresh頁面，因為時間一到按鈕通常會自動變成可以撳嘅掣。以下係小編之前用各大售票網站嘅時候發現嘅小秘訣，不妨可以參考

• NOL Ticket：會顯示倒數時間，等時間到就可以撳預約
• Melon Ticket：會顯示倒數時間，唔使手動重新整理頁面
• YES24：有機會要手動重新整理頁面，最好事前試預約其他門票測試

正式開賣時間

如果頁面有顯示倒數時間，預約按鈕通常會自動開放，見到就要即刻撳；如果冇，就要喺正式開賣嗰一刻refresh頁面，再立即撳預約。

撳預約之後有可能會先去到等候排隊畫面，呢個時候記住唔好驚，亦都絕對唔好閂頁面，只要等就會成功排到入去，正式進入揀位頁面。

Step 8 | 揀位時最重要係快

揀位階段通常係成個流程最緊張嘅部分，入到去之後你會見到可選座位會以綠色、紫色等特別顏色標示，通常已售出座位會顯示為灰色或者不可選。呢個時候最重要唔係慢慢研究，而係即刻按照你之前排好嘅優先次序去撳要預約嘅作爲。

做法應該係：

1. 先搵第一志願區域
2. 見到位就即刻撳
3. 如果冇位，立刻轉第二志願
4. 如果都係冇就隨便揀一個可以預約嘅座位，然後撳「下一步(다음)」或者「選擇(선택)」

Step 9 | 用準備好嘅付款方法俾錢

當你去到呢一步，其實已經好接近成功！揀完座位之後，通常就會叫你揀取票方式（現場/郵寄）同付款方式，小編自己買飛都親身試過用唔同方法俾錢，最推薦嘅付款方法係（按推薦順序）：

• 銀行轉帳(무통장입금) — 可以即時留位，之後有24小時時間俾錢，不過前提係你要有韓國銀行戶口，或者有人可以幫你入數
• KakaoPay —  如果你一早已經設定好，付款速度會非常快
• 信用卡 — 因為要即時處理交易，速度通常會慢少少，但對大部分外國人嚟講係最常用嘅付款方式

如果你用信用卡付款，記住資料一定要填啱，特別係到期日同CVV安全碼，輸入後最好再睇清楚一次；如果你係用銀行轉帳，就要留意系統顯示嘅入數資料。一般會有24小時可以去韓國銀行或者ATM入數，或者由其他人代你完成付款。

最後，記得撳埋最終嘅 「Pay」或「Confirm」 按鈕，完成付款程序。

Step 10 | 成功後記得即刻保存確認資料

如果畫面出現預約完成(예매완료)，唔好掛住開心，仲要即刻截圖、記低預約編號、睇確認電郵，確認自己買咗邊一日、邊一場、邊個座位。

另外如果會揀現場取票，當日記住要準備護照或者外國人登錄證等身份證明文件同購票確認資料，有需要時記住帶埋買飛當時用嘅信用卡。

同場加映：多分頁預約法

有啲資深粉絲會用多分頁預約法增加入場機會，例如同一頁面開2至3個 tab，再略為錯開時間重新更新頁面。理論上，咁做有機會提高其中一個分頁較快進入排隊或購票頁面嘅機會。

不過，唔係每個平台都容許咁做，有啲網站甚至可能會限制或視為異常操作。所以如果你打算用呢個方法，最好事前先了解清楚平台規則，唔好因為開太多分頁反而令自己被擋。

如果搶唔到韓國演唱會飛仲可以點做？

一切都準備好，但最後搶唔到飛，真係要就咁放棄？其實韓國售票平台之後仲會陸續出現取消票，甚至有啲人就係靠執取消票入場。

取消票_(취소석)通常係有人訂咗但冇完成付款、有人買咗之後改場次之後取消原先預約，系統就會釋放之前未完成交易嘅座位。所以就算開賣嗰刻顯示售罄，之後都仍然有機會買到門票！

而根據小編經驗，取消票通常會喺以下時段出現：

• 首輪開賣之後付款期限一過（通常係24小時後）
• 演唱會前兩至三星期
• 演唱會前幾日

所以如果你真係好想睇某場韓國演唱會，可以朝早、下晝、夜晚定時去售票網站睇下有冇取消位突然放咗出嚟。通常會突然喺成片灰色（即係全部賣晒）嘅座位圖入面，突然見到一個紫色可選座位，一見到有位就要即刻出手，因為取消位通常幾分鐘內就會俾人搶走。小編有幾次買到唔錯嘅位，反而靠執取消票買到，所以記住唔好放棄最後希望！

好多人搶唔到韓國演唱會飛之後就會上網搵二手票或者轉售門票，雖然有啲演出會設有官方轉讓或交換機制，但唔係每場都有，網上見到嘅大部分都會係黃牛飛。

如果買黃牛飛，好有可能會遇到假票、假截圖、收錢後失聯等問題。而且幾乎所有韓國KPOP偶像演唱會都會進行身份核對程序，所以就算你買到飛，都未必等於可以順利入場，所以切記唔好輕信網上非官方轉售門票嘅資訊！

如果買完演唱會飛想取消/退款要點做？

如果你買咗飛之後去唔到，通常都可以喺平台內自行取消。不過實際退款規則會因平台、主辦方同演出而有分別。

一般流程通常係：

1. 登入售票網站，入「我的門票(마이티켓)」或者「訂單記錄(예매내역)」
2. 搵返演唱會門票訂單，撳「取消(취소)」申請取消
3. 確認退款安排

通常越早取消，手續費就會越低，某啲平台仲可以短時間內免費取消。而且去到演出前一兩日，有可能已經唔設退款，退款退返落信用卡或原付款帳戶，通常都要幾個工作天，唔一定會即時見到。

💡小編小貼士：買飛前或者買完之後記住順手睇清楚取消政策，唔好去到最後一刻先發現自己蝕咗筆錢！

演唱會當日有咩要注意？

入場時間&必帶物品

終於去到最期待最開心嘅演唱會當日，大家去會場之前記住一定要帶有效身份證明文件（例如護照、外國人登錄證）同訂票確認資料（電子版或列印本都得），如果唔係會影響到領取門票。

而大家可能會問，應該提早幾多去到演唱會場地好？到場時間其實好視乎你需唔需要現場取票、買嘅係企位定坐位飛同你需唔需要買週邊商品。最穩陣係比起喺演唱會門票預訂頁面上所列明嘅時間再早1-2個鐘到場，而根據小編去過咁多次韓國演唱會嘅經驗：

• 如果想買現場週邊，有啲人前一晚，甚至朝早好早就開始排隊
• 如果係企位，通常會喺開場前約3個鐘開始入場
• 如果係坐位，基本上只要喺演出開始前入場就可以 (但因為身份核對過程需時，所以建議再提早少少到場）

💡小編小貼士：如果大家想租返部追星神器手機影低本命勁歌熱舞嘅相片或者影片留念，或者臨時需要租借應援棒，都可以透過Creatrip預約相關服務，令你今次韓國演唱會體驗更完美！

[스팟] 仁川機場Galaxy S Ultra手機租借服務

[스팟] 首爾市區Galaxy S Ultra手機租借服務（Snapshoot弘大店）

[스팟] 首爾市區Galaxy S Ultra手機租借服務（Snapshoot奧林匹克公園店）

[스팟] Snapshoot 應援棒 | 偶像應援棒出租

演唱會場館交通

KSPO首爾奧林匹克體操競技場、高尺天空巨蛋、高陽綜合運動場、仁川Inspire Arena等韓國主要演唱會場館通常都可以搭地鐵去到，不過演出當日通常人會非常多。

💡小編小貼士：如果你擔心拖住行李搭公共交通唔方便，或者唔想散場之後同大批人一齊逼車，Creatrip有提供來回首爾市區同主要場館嘅演唱會接駁車服務！

[스팟] BTS WORLD TOUR 'ARIRANG' | 首爾⇌高陽綜合運動場演唱會接駁車輛+行李保管服務

[스팟] 5折優惠 | 首爾⇌高陽一山Kintex演唱會接駁車輛+行李保管服務

[스팟] 5折優惠 | 首爾⇌仁川文鶴競技場演唱會接駁車輛+行李保管服務

[스팟] 5折優惠 | 首爾⇌仁川Inspire Arena演唱會接駁車輛+行李保管服務

[스팟] 5折優惠 | 仁川亞運綜合運動場來回接駁車輛+行李保管服務

韓國演唱會購票常見問題FAQ

Q1. 外國人可唔可以喺韓國網站買演唱會飛？

A：可以。NOL、YES24、Melon Ticket 等主要平台都支援海外用戶購票。不過，外國人通常要用電郵而唔係韓國手機號碼去開帳號，而付款步驟亦有機會麻煩少少。一般嚟講信用卡都可以用，但如果講求速度，通常都係韓國銀行轉帳 更快。

Q2. 人氣演唱會購票成功率高唔高？

A：老實講唔算高，特別係頂級人氣團體，首輪開賣競爭可以非常誇張。以小編自己經驗估算，假如係 BTS、BLACKPINK、SEVENTEEN 呢個級數嘅演唱會，公開開賣時單次搶飛成功率可能大約只係 1% 至 5%。如果係中等人氣歌手或團體，成功率可能會高啲，大概 20% 至 40% 左右。但如果你有官方會員資格可以事先進行預售，或者願意等取消票，成功機會會提升唔少。

Q3. 搵門票代搶服務值唔值得？

A：呢個真係要視乎你預算有幾多，同埋你有幾想要嗰張飛。有經驗嘅搶飛代理，的確有機會提高成功率，因為佢哋熟流程，亦可能有自己一套方法。不過同時服務費可能好高，有時會比票面價貴30~50%以上，而且唔係百分百保證成功、合規性方面有灰色地帶。如果你真係好想睇，而且預算又容許，代搶可以係其中一個選擇；不過，記得一定要事前查清楚對方背景，唔好隨便搵來歷不明嘅人。

Q4. 應該幾早開始準備搶飛？

A：最好最少喺開賣前一星期開始準備。小編個人習慣開賣前1星期用TIKI或Grape Game練習，確認開賣時間，同埋揀定目標座位區；開賣前1日做最後一次流程練習、較好鬧鐘、整理好搶飛設備同畫面；開賣當日提早10至15分鐘登入，開定Navyism對好伺服器時間，越早準備，正式開賣時就越唔容易亂。

Q5. 如果頁面上顯示「본인인증 필요(需要本人認證)」字眼要點做？

A：通常代表該場購票流程涉及韓國本地身份驗證，外國人未必可以買到。如果遇到呢種情況，可以睇下有冇國際版網頁，或者會唔會另外有賣外國人專用門票嘅平台，你亦可以考慮其他合法方式。Creatrip網站上不定期會售賣各種大型頒獎典禮同演唱會嘅外國人專用門票，可以參考以下網頁👉🏻KPOP演唱會/頒獎典禮門票

Q6. 買咗飛但去唔到，可唔可以退款？

A：通常可以，但會視乎取消時間收取手續費，實際規則請參考你買嘅演唱會門票嘅退改政策。

Q7. 攞住外國人證件可唔可以現場取票？

A：可以，通常大部分演唱會職員都會要求你出示護照或者係外國人登錄證，但每場演出可能會有個別要求，請以主辦公告為準。

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！